حضرت جعفر بن ابو طالب عبد ِمناف قریشی ہاشمی رضی اللہ عنہٗ

آپؓ کا نام: جعفر، کنیت: ابوعبداللہ، والد کا نام: عبدِ مناف (ابوطالب) اور والدہ کا نام: فاطمہ تھا۔ آپؓ کا شجرۂ نسب یہ ہے: جعفر بن ابو طالب بن عبدالمطلب بن ہاشم بن عبدِ مناف بن قصی قرشی ہاشمی۔ آپؓ حضور اقدس ﷺ کے چچا کے بیٹے اور حضرت علی کرم اللہ وجہہ کے عمر میں دس سال بڑے حقیقی بھائی تھے۔ آپؓ کی پیدائش 589ء (22 سال قبل از نبوت) میں مکہ مکرمہ میں ہوئی اور ۸ھ / 629ء میں جنگِ موتہ میں شہید ہوئے۔

حضرت جعفرؓ کے قبولِ اسلام کا واقعہ یہ ہے کہ ایک روز حضرت علیؓ رسول اللہ ﷺ کے ساتھ دائیں طرف کھڑے عبادت میں مشغول تھے۔ آپؓ کے والد ابوطالب نے اپنے دوعزیزوں کو بارگاہِ صمدیت میں سر بہ سجود دیکھا تو اُن کے دل پرخاص اثرہوا۔ چناں چہ ابوطالب نے اپنے بڑے بیٹے حضرت جعفرؓ کی طرف دیکھ کر کہا: ’’جعفر! تم بھی اپنے چچا زاد (حضوؐر) کے پہلو میں بائیں طرف کھڑے ہوکر دست و بازو بنو۔ اس طرح حضرت جعفرؓ نے پہلی دفعہ نماز ادا کی۔ اس عبادت میں آپؓ کو ایسی لذت محسوس ہوئی کہ وہ بہت جلد مسلمان ہو گئے۔اس وقت تک اکتیس بتیس آدمی مشرف بہ اسلام ہوئے تھے۔ اس طرح حضرت جعفرؓ آغازِ اسلام کی نمایاں شخصیات میں شمار ہوتے ہیں۔ مسلمانوں نے حبشہ کی طرف ہجرت کی تو آپؓ مہاجرین کے قائد تھے۔ شاہِ حبشہ نجاشی کے دربار میں کی گئی آپؓ کی تقریر ادب کا شہ پارہ اور اسلام کا خلاصہ تصور کی جاتی ہے۔

حضرت جعفرؓ انتھائی سخی، کشادہ دل اور فیاض تھے۔ غربا و مساکین کو کھانا کھلانے میں آپؓ کو خاص لطف حاصل ہوتا تھا۔ حضوؐر آپؓ کو ’’ابو المساکین‘‘ کے نام سے یاد فرمایا کرتے تھے۔ حضرت جعفرؓ کے فضائل ومناقب کا پایہ نہایت بلند تھا۔ خود حضوؐر آپؓ سے فرمایا کرتے تھے کہ: ’’جعفرؓ! تم میری صورت و سیرت دونوں میں مجھ سے مشابہ ہو‘‘۔ نیز فرمایاـ کہ: ’’مجھ سے پہلے جس قدر نبی گزرے ہیں، ان کو صرف سات رفیق دیے گئے تھے، لیکن میرے رفقائے خاص کی تعداد چودہ ہے، ان میں سے ایک جعفرؓ بھی ہیں‘‘۔ حضرت ابوہریرہؓ فرماتے ہیں کہ: ’’رسول اللہؐکے بعد اونٹنی پر سواری کرنے میں جعفرؓ سب سے افضل ہیں‘‘۔ (جامع ترمذی)

حضرت جعفرؓ آپ ﷺ کی ہجرتِ مدینہ کے چھ سال بعد تک حبشہ ہی میں رہے۔ ۷ھ / 628ء میں مدینہ تشریف لائے۔ اس وقت فتح خیبر ہوچکا تھا اور مسلمان اس کی خوشی منا رہے تھے کہ مسلمانوں کو اپنے دور افتادہ بھائیوں کی واپسی کی دوہری خوشی حاصل ہوئی۔ حضرت جعفرؓ سامنے آئے تو آپؐ نے ان کو گلے سے لگایا اورپیشانی چوم کر استقبال کیا اور فرمایا: ’’میں نہیں جانتا کہ مجھ کو جعفر کے آنے سے زیادہ خوشی ہوئی یا خیبر کی فتح سے!‘‘۔ حضرت جعفرؓ کی واپسی کو ابھی ایک سال بھی گزرنے نہ پایا تھا کہ جمادی الاولیٰ ۸ھ میں موتہ پر فوج کشی ہوئی۔ آپؐ نے فوج کا عَلم زید بن حارثہؓ کو عطا کرکے فرمایا کہ: ’’اگر زید شہیدہوں تو جعفرؓ اوراگر جعفرؓ بھی شہید ہوں تو عبداللہ بن رواحہؓ اس جماعت کے امیر ہوں گے‘‘۔ اس غزوے میں آپؓ نے جامِ شہادت نوش فرمایا۔ (صحیح بخاری)