میت کی طرف سے حجِ بدل کا حکم

ایک مال دار شخص بغیر حج کیے فوت ہوگیا۔ اس کے وارث اس کا مال کسی مصرفِ خیر میں مثلاً ادارہ / مسجد وغیرہ کی تعمیر میں لگادیں تو کیا یہ جائز ہے؟ یا حج بدل کرائیں؟

حج بدل کرانا چاہیے اور اس کی دو صورتیں ہیں:

۱) ایک یہ کہ متوفی پر حج فرض تھا، اس نے حج کرانے کی وصیت کی تو اس کے تہائی مال سے حج بدل کرانا ورثا کے ذمے ضروری ہے۔ دوسرے مصرف میں یہ پیسہ خرچ نہیں ہوسکتا۔

۲) دوسری صورت یہ ہے کہ متوفی نے حج کی وصیت نہیں کی۔ تو اس صورت میں بہتر ہے کہ حج بدل کرایا جائے اور اس قدر روپیہ یا کم و بیش مسجد / دینی ادارے میں لگا دیا جائے تو بھی درست ہے۔ بشرطیکہ سب ورثا بالغ ہوں۔ سب کی رضا سے ایسا ہوسکتا ہے۔