نمازِ جمعہ و عیدین میں سجدہ سہو کا حکم

اگر نمازِ جمعہ یا نمازِ عیدین میں امام قراءت بلند آواز سے کرنے کے بجائے بھول کر آہستہ آواز سے قراءت کر لے، تو کیا نمازِ جمعہ اور نمازِ عیدین درست ہو جائیں گی؟ نیز ایسی صورت میں سجدۂ سہو کافی ہوگا یا نہیں؟

​نمازِ جمعہ و عیدین میں امام کے لیے جہراً (بلند آواز سے) قراءت کرنا واجب ہے۔ لہذا اگر امام نے بقدرِ تین مختصر آیات یا ایک طویل آیت، یا اس سے زائد مقدار میں قراءت سراً (آہستہ آواز میں) کی تو سجدہ سہو کے لیے حکم یہ ہے کہ:
​(1) اگر نماز جمعہ شہر کی جامع مسجد اور عیدین عیدگاہ میں پڑھائی جائیں، تو چوں کہ عموماً وہاں بڑا اجتماع ہوتا ہے، اس لیے سجدہ سہو نہ کیا جائے تاکہ لوگ کسی غلط فہمی اور تشویش میں مبتلا نہ ہوں۔
​(2) اگر نماز جمعہ و عیدین چھوٹی مساجد میں ادا کی جائیں، جہاں جماعت مختصر ہو کہ بغیر کسی الجھن کے تمام لوگوں کو سجدہ سہو کا علم ہوجائے گا تو ایسی صورت میں سجدہ سہو کرنا بہتر ہے۔
​اسی طرح کے ایک مسئلے کے سلسلے میں مفتی اعظم ہند حضرت مفتی محمد کفایت اللہ دہلویؒ فرماتے ہیں:
”جماعت زیادہ بڑی نہ ہو اور کسی گڑ بڑ کا خوف نہ ہو تو جمعہ و عیدین میں بھی سجدہ سہو کرلیا جائے۔ البتہ کثرت جماعت کی وجہ سے گڑ بڑ کا خوف ہو تو سجدہ سہو ترک کردینا مباح ہے۔“⁽¹⁾

(1) کفایت المفتی، (ملتان، مکتبہ امدادیہ)، کتاب الصلاۃ، چھٹا باب نمازِ عیدین، 252/3