عدت کے دوران نکاح کا حکم

ایک لڑکے اور ایک لڑکی نے والدین کی اجازت کے بغیر دو گواہوں کی موجودگی میں نکاح کرلیا۔ وہ دونوں میاں بیوی کے طور پر گاہے بگاہے ملتے رہے۔ لڑکی کے والدین کو علم ہونے پر انھوں نے ان دونوں کی سرزنش کی، جس کے بعد لڑکی کے والدین اشتعال میں آگئے اور فوری طور پر اس لڑکے سے طلاقِ بائنہ لے لی اور دوسرے ہی دن اس لڑکی کی شادی ایک دوسرے شخص سے کردی۔ یہ دوسرا نکاح شرعی طور پر درست ہے یا نہیں؟

والدین کی اجازت کے بغیر خفیہ طور پر نکاح کرنا اگرچہ نازیبا عمل ہے، لیکن جب اس میں دو گواہ موجود تھے تو شرعی طور پر نکاح کا انعقاد مکمل ہوگیا۔ اس لیے اس کے بعد اس وقت تک دوسرا نکاح کرنا درست نہیں، جب تک کہ پہلے شوہر سے طلاق لینے کے بعد اس کی عدت پوری نہ ہوجائے۔ اس لیے دوسرا نکاح درست نہیں ہے۔ دونوں کے درمیان فوری طور پر تفریق لازمی ہے۔