سیرت بیان کرنے کے لیے پیشہ ور نعت خوانوں کو بلانا

آپ ﷺ کی سیرت ماہِ ربیع الاوّل میں بیان کی جاتی ہے۔ اس سلسلے میں پیشہ ور نعت خوانوں اور واعظ حضرات کو بیان کے لیے بلوانا کیسا ہے؟

حضور اکرمؐ کے حالات پڑھنے اور سننے یا جاننے کا شوق ہو تو کسی سیرتِ نبویؐ کے متبع اور سنت ِنبویہؐ کے عالم ربانی کی کتاب کا مطالعہ کیا جائے۔ اور صاحب ِنسبت عالم کا وعظ سنا جائے۔ مثلاً کتابوں میں حضرت امام شاہ ولی اللہ دہلویؒ کی ”سیرتِ رسول“، حضرت مولانا حفظ الرحمن سیوہارویؒ کی ”سیرتِ رسول کریمؐ“ اور حضرت مولانا محمدمیاںؒ کی ”محمدرسول اللہ“ یا ”مختصر تاریخ اسلام“ از مولانا غلام رسول مہر وغیرہ مستند کتابیں ہیں۔ کسی پیشہ ور عالم یا نعت خواں کو بلانا درست نہیں، جو کہ اپنے نعت خوانی یا وعظ کے پیسے مقرر کرکے لیتے ہیں۔