تحریری طلاق کا حکم

میں نے اپنی بیوی کو ایک کاغذ پر لکھ کر بھیجا کہ ”میں نے زینب بنت عبد اللہ کو طلاق دی ہے“ کیا یہ طلاق شمار ہوگی؟۔ طلاق کو ایک سال ہوچکا ہے۔ بیوی کی عدت بھی پوری ہوگئی ہے۔ کیا اب دوبارہ نکاح کرسکتا ہوں؟

مذکورہ بالا تحریر لکھنے سے بیوی پر ایک طلاق رجعی واقع ہوچکی تھی اور شوہر کے پاس دورانِ عدت رجوع کا اختیار تھا، لیکن چونکہ عدت ختم ہونے کے ساتھ رجوع کا حق بھی ختم ہوچکا ہے اور نکاح بھی ٹوٹ چکا ہے، اس لیے اب باہمی رضامندی سے دوبارہ رشتۂ ازدواج میں منسلک ہونے کے لیے دو گواہوں کی موجودگی میں مہرِ جدید کے ساتھ نکاحِ جدید ضروری ہے، بشرطیکہ خاوند نے اس تحریری طلاق سے قبل کوئی طلاق نہ دی ہو، یا صرف ایک طلاق دی ہو۔