”تم میری طرف سے فارغ ہو“ کہنے سے طلاق کا حکم

معمولی بات پر بحث کے دوران جب نہ تو موضوع طلاق کا تھا اور نہ ہی اس وقت میرا ارادہ بیوی کو طلاق دینے کا تھا۔ مگر بیوی نے گرما گرمی (غصہ) میں بول دیا آپ کو جو فیصلہ کرنا ہے کریں اور جواباً غصے کی حالت میں، میں نے بول دیا:
”تم میری طرف سے فارغ ہو“۔
سوال یہ ہے کہ کیا ان الفاظ کے بولنے سے جب کہ اس وقت نہ مذاکرہ طلاق تھا اور نہ ہی پہلے سے میرا طلاق کا ارادہ تھا تو کیا ایسی صورت میں میری بیوی پر طلاق واقع ہوئی ہے؟

​غصہ کی حالت میں مذکورہ الفاظ (تم میری طرف سے فارغ ہو) کہنے سے بیوی پر ایک طلاق بائن واقع ہوچکی ہے، جس کا حکم یہ ہے کہ میاں بیوی کا نکاح ختم ہوچکا، اب دونوں کا اکھٹے رہنا جائز نہیں ہے، البتہ اگر دونوں باہمی رضامندی سے دوبارہ ساتھ رہنا چاہیں تو مہرِ جدید کے ساتھ دو گواہوں کی موجودگی نکاحِ جدید کرنا لازم ہوگا۔