رضاعی بہن بھائیوں کی اولاد سے نکاح کا حکم

ایک شخص مسمی زید نے اپنی مدتِ رضاعت میں اپنی دادی کا دودھ پیا ہے۔ تو کیا زید کا اپنی چچا زاد بہن سے نکاح کرنا شرعی طور پر جائز ہے یا نہیں؟

زید نے بچپن میں اپنی دودھ پینے کی عمر میں اپنی دادی کا دودھ پیا ہے۔ اس لیے اس کی یہ دادی بچپن میں اس کا دودھ پینے کی وجہ سے اس کی رضاعی والدہ بھی ہوگئی اور اس کی اولاد اگرچہ نسب کے لحاظ سے زید کے چچے، پھوپھیاں ہیں، لیکن رضاعت کے اعتبار سے اس کے بھائی بہن ہوگئے۔ اور ان کی اولاد زید کے بھتیجے، بھتیجیاں اور بھانجے بھانجیاں ہوں گی۔ جیسے نسبت میں بھتیجے بھتیجیوں سے نکاح درست نہیں ہوتا، ایسے ہی رضاعت میں بھی ان سے نکاح درست نہیں۔ لہٰذا شرعی طور پر زید کا اپنی چچا زاد سے نکاح درست نہیں ہے۔