تراویح میں تیسری رکعت کے لیے کھڑا ہونا

ایک امام غلطی سے نمازِ تراویح میں دوسری رکعت کے بعد قعدہ کرکے تیسری رکعت کے لیے کھڑا ہوگیا اور تیسری رکعت بھی مکمل کرلی تو وہ اب کیا کرے؟

اگر امام نے دوسری رکعت میں قعدہ کرلیا ہے تو دو رکعتیں اَور ساتھ ملا کر چار رکعات کے بعد سلام پھیر دے، نمازِ تراویح صحیح ہوجائے گی۔ مگر افضل عمل دو دو رکعت کرکے پڑھنا ہے۔ ہاں! اگر امام صاحب نے دوسری رکعت کے بعد قعدہ نہیں کیا اور تیسری رکعت کے لیے کھڑا ہوگیا تو اگر اس کو قیام میں یاد آگیا یعنی تیسری رکعت کے سجدے سے پہلے پہلے یاد آگیا تو اُسے چاہیے کہ واپس بیٹھے، قعدہ کرے اور سجدہ سہو بھی کرلے۔ البتہ اگر تیسری رکعت کا سجدہ کرلینے کے بعد یاد آیا تو ایک رکعت اَور پڑھ کر سجدہ سہو کرکے نماز سے فارغ ہو۔ اس صورت میں اس کی پہلی دو رکعتیں نفل اور بعد والی دو رکعتیں تراویح شمار ہوں گی۔ اس لیے بہتر یہ ہے کہ پہلی دو رکعتوں میں پڑھے جانے والے قرآن حکیم کی قرأت دوبارہ کرلے۔