احرام کے بغیر مکہ مکرمہ جانے کا حکم

عمرے کے سفر میں مکہ مکرمہ پہنچنے پر احرام باندھا جاسکتا ہے؟ کیا اس کے لیے مسجد عائشہ جانا پڑے گا؟

عمرہ یا حج پر بذریعہ ہوائی جہاز جانے والے حضرات کے لیے مناسب یہ ہے کہ وہ ائیرپورٹ پر وضو یا غسل کرکے احرام کی چادریں باندھ لیں۔ اور دو رَکعت نماز نفل پڑھ کر جہاز میں سوار ہوں۔ لیکن احرام کی نیت نہ کریں۔ جب میقات سے جہاز گزرنے لگے تو اس سے تھوڑی دیر پہلے احرام کی نیت سے تلبیہ (لبّیک اللّٰہمّ لبّیک ۔۔۔ الخ) پڑھے۔ جس سے اس کا احرام شروع ہوجائے گا۔ اور تمام ممنوعاتِ احرام سے بچے۔ اگر بغیر احرام مکہ مکرمہ پہنچ گیا تو اس کو دم دینا ہوگا، کیوں کہ آفاقی (حدودِ میقات سے باہر رہنے والے) کے لیے مکہ مکرمہ میں بغیر احرام داخل ہونا درست نہیں۔ مسجدِ عائشہ سے احرام صرف ان لوگوں کے لیے ہے، جو مکہ مکرمہ میں موجود ہوں۔