پہلے شوہر سے ملی ہوئی جائیداد میں دوسرے شوہر کی اولاد کا حق

زید کی شادی ناصرہ سے ہوئی، جس سے اس کا ایک بیٹا پیدا ہوا۔ اس کے بعد زید کا انتقال ہوگیا اور اس کی وراثت اس کے بیٹے اور بیوہ ناصرہ وغیرہ میں تقسیم ہوگئی۔ عدت کے بعد ناصرہ نے بکر سے شادی کرلی۔ اس سے بھی ایک بیٹا پیدا ہوا، جس کے بعد ناصرہ کا انتقال ہوگیا۔ ناصرہ کی وراثت صرف وہی جائیداد ہے، جو اس کو پہلے شوہر زید کی وراثت میں ملی تھی تو اس جائیداد میں ناصرہ کے دونوں بیٹے وارث ہوں گے یا صرف پہلے شوہر زید کا بیٹا؟

ناصرہ کو اپنے پہلے شوہر زید کی طرف سے جو حصۂ وراثت ملا، شرعی طور پر وہ اس کی مکمل مالک بن گئی۔ اس حصۂ وراثت اور اس کی دیگر املاک میں کوئی فرق نہیں۔ چناں چہ ناصرہ کی وفات کے بعد اس کی تمام اَملاک اُس کے شرعی ورثا میں تقسیم ہوں گی۔ اور ناصرہ کے دونوں بیٹے اپنی والدہ کی میراث میں بغیر کسی کمی بیشی کے یکساں طور پر شریک ہوں گے۔