غیر مسلموں کے برتن استعمال کرنے کا حکم

غیر مسلم لوگوں کے برتن کا استعمال مسلمان کے لیے درست ہے یا نہیں؟ خصوصاً یورپ اور امریکہ میں، جہاں پر حرام اور نجس اشیاء کا استعمال بھی ہے؟

​جہاں تک غیر مسلم کے جھوٹے برتن کی بات ہے، تو وہ پاک ہے۔ اور برتن میں ناپاک اشیاء کا استعمال ہوا ہے یا نہیں، اس شبہ کی بنا پر برتن کو ناپاک نہیں کہا جاسکتا۔ شریعت ان احکام میں زیادہ تلاش و جستجو کو پسند نہیں کرتی۔ البتہ جن ممالک میں ناپاکی کا احتمال قوی ہے اور جہاں خنزیر کی چربی کا مختلف غذاؤں میں بکثرت استعمال ہو رہا ہے، وہاں ان کے برتن کو دھو کر استعمال کرنا چاہیے اور دھونے میں نیت وغیرہ ضروری نہیں۔ اور ایسے ہی دھونے والا خواہ مسلم ہو یا غیر مسلم، سب برابر ہیں۔ برتن دھونے سے بہرصورت پاک ہوجائے گا۔