تسبیحات کس ہاتھ پر پڑھنی چاہییں؟

حضرت مفتی صاحب! میرا سوال یہ ہے کہ فرض نماز کے بعد والی تسبیحات دونوں ہاتھوں کی انگلیوں پر پڑھنی چاہییں یا صرف دائیں ہاتھ کی انگلیوں پر؟ ایک شخص اس معاملے میں شدت اختیار کرتے ہوئے لوگوں کو دائیں ہاتھ پر تسبیح کی تاکید کرتا ہے۔

تسبیحات دائیں ہاتھ پر پڑھنا بہتر ہے۔ حدیث مبارک کے مطابق دائیں ہاتھ پر تسبیح کرنا رسول اللہ ﷺ سے ثابت ہے:

عَنْ عَبْدِ اللهِ بْنِ عَمْرٍو، قَالَ: " رَأَيْتُ رَسُولَ اللهِ صلى الله عليه وسلم يَعْقِدُ التَّسْبِيحَ بِيَمِينِهِ ⁽¹⁾
حضرت عبد اللہ بن عمرو سے مروی ہے کہ انہوں نے فرمایا: ”میں نے رسول اللہ ﷺ کو دائیں ہاتھ پر تسبیح شمار کرتے ہوئے دیکھا“۔

البتہ دونوں ہاتھوں پر تسبیحات پڑھنا شرعاً ممنوع نہیں بلکہ اس کا تعامل امت میں قدیم زمانے سے تواتر کے ساتھ چلا آ رہا ہے، اور سلف صالحین یا سابقہ ادوار کے اہل علم نے بھی اس سے منع نہیں فرمایا۔ چونکہ یہ معاملہ وسعت رکھتا ہے، اس لیے اس سلسلے میں کسی بھی قسم کی شدت، سختی یا تفریق پیدا کرنے والے رویے سے گریز کرنا چاہیے اور اسے باہمی اختلاف یا تنقید کا موضوع نہیں بنانا چاہیے۔

(1)  (السنن الکبری، (بیروت، دار الکتب العلمیۃ)، باب الترغيب في مكث المصلي في مصلاه لإطالة ذكر الله تعالى في نفسه.... 267/2، رقم : 3027)