میت کو قبرستان لے جاتے وقت اس کے پاؤں قبلہ رخ ہونے کا حکم

میت کو کندھوں پر اٹھا کر، جب قبرستان کی طرف جا رہے ہوتے ہیں تو راستے میں اگر مشرقی رخ جانا ہو، تو میت کا رخ الٹ کر، لوگ اس کے پاؤں آگے کر لیتے ہیں، یہ احتیاط کرتے ہوئے کہ اس کے پاؤں کہیں قبلہ رخ نہ ہوں۔ کیا اس بات کا خصوصی اہتمام کرنا کہ میت کے پاؤں کس رخ ہیں، لازمی ہے؟

قبرستان لے جاتے وقت میت کا سر آگے رکھنا چاہیے۔ اس حالت میں اگر میت کے پاؤں قبلہ رخ ہو جائیں تو اس میں کوئی حرج نہیں۔ نیز اس قسم کا اہتمام لوگوں کے لیے بلاوجہ مشقت کا باعث ہے، جب کہ شریعت میں اس کی کوئی اصل موجود نہیں۔ اس لیے اسے ضروری سمجھ کر اختیار کرنا جائز نہیں۔

واللہ تعالٰی اعلم بالصواب