شوہر کی طرف سے مختلف اوقات میں دی ہوئی طلاقوں کا حکم

میرے شوہر نے ایک وقت میں مجھے تین مرتبہ طلاق کے الفاظ کہے، بعد ازاں مجھ سے رجوع کرنے کو کہا اور میں نے رجوع کرلیا۔ پھر کچھ عرصہ بعد انہوں نے دو مرتبہ طلاق کے الفاظ کہے اور دوبارہ رجوع کرلیا۔ اس کے بعد کچھ مدت گزری، تو انہوں نے پھر تین مرتبہ طلاق کہی۔ مزید یہ کہ تقریباً چھ ماہ قبل انہوں نے طلاق تحریری طور پر کاغذ پر لکھ کر مجھے پڑھائی اور پھر وہ کاغذ چھپا لیا۔
اب یہ دریافت کرنا ہے کہ ان صورتوں میں شرعاً طلاق واقع ہوچکی ہے یا نہیں؟​

صورت مسئولہ میں آپ کے شوہر نے جب پہلی مرتبہ آپ کو تین بار طلاق کے الفاظ کہے تھے، تو اس سے تینوں طلاقیں واقع ہوکر رجوع کی گنجائش ختم ہوچکی تھی۔ اس کے بعد دونوں کا بطور میاں بیوی رہنا حرام تھا۔ پس آپ دونوں پر لازم ہے کہ فی الفور جدا ہو جائیں اور اتنا عرصہ ناجائز تعلق پر اللہ تعالیٰ کے حضور توبہ و استغفار کریں۔